Dumka,
Ạdivạsi maejiu koaḱ saṅghars reaḱ to̱ṅge nagam do̱ ạjgut ar udgạunaoaḱ kana. Niạ saṅghars do̱ ekan Phulo-Jhano hạbić do̱ baṅ kana, bickom unkin lekan asambhe̱ṛ hapṛam era ar nãhãḱ okte ren maejiuko hõ̱ niạ saṅghars reko jiwedo̱ḱ kana. Saṅghars do̱ unkoaḱ jion reaḱ mit́ hĩs kana ar unko do̱ akoaḱ ạidạri o̱t-hasa lạgit́ letaṛ geko lạṛhạe kana. Disom reaḱ jo̱to̱ khon maraṅ maejiu bandhao do̱ “Krantikari Adivasi Mahila Saṅgaṭhan’ kana, Jãhã bandhao re maejiu koaḱ lekah do̱ barpe serma laha are gel are hajar tahẽ̱kana. Noa bandhao do̱ disom reaḱ taeom akan ṭo̱ṭha kore menaḱa. Behok birud re jagwar ar Saṅghars ko ńel tuluć niạ memen jothat hoyoḱa je akote lạio̱ḱ mukhiạ dhara ren ko do̱ ạdivạsiko ṭhen khon behike baṅ batao ar sirjo̱n rukhiạe reaḱ ce̱t́ hoyoḱ takoa.
Naganiạ Ạdivạsi ando̱lan ko re maejui koaḱ enem:
- Cuaṛ Hul (1767-1816): Niạ Hul do̱ iṅrạj ko birudre tahẽ̱kana ar Bhumij ạdivạsi ho̱ṛko lạṛhạe lena. Ạdivạsi maejui ko do̱ herel ko sãote bir ar buru kore uku kate iṅrạj phạd ṭhen khon eṛan kate ar jạruṛan khobor ko seṭer ako kan tahẽ̱kana. Niạ hul re aema ạdivạsi maejiuko saṕ oco lena ar ạḍi aṭko nahcar ocolena.
- Ko̱l Hul (1827-28): Niạ hul re do̱ urạõ jạt ren budhu bhagat ren hopon era runia-jhunia tạkin sẽṛa enam tahẽ̱kan tạkinạ. Unkin do̱ apattet́ sạo ato̱-ato̱ dãṛã kate ho̱ṛkin mit́jumeṭ ko kan tahẽ̱kana ar unkin do̱ lạṛhạe hunạr re pạrukhiạ kin tahẽ̱kana. Unkin do̱ iṅrạj birud re kin lạṛhạ ena ar kin sạhid ena.
- Santal Hul (1855-56): Sido-Kanhu ren misra Phulo ar Jhano tạkin do̱ niạ hul re maejiu ko kin mit́jum keṭ koa ar iṅrạj phạdaḱ chạuni re kin hamla leda. Unkinaḱ ạyurte iṅrạj palṭon 21 jona ko goć ocolena. Niạ hul khạtir te birbhum jilạ santhal koaḱ go̱bo̱l re heć ena.
- Munḍa Ulgulạn (1894-1900): Birsa Munḍawaḱ ạyurte ho̱e noa hul re maki, thiṅki. Negi. Limbu ar candi tako do̱ maejiu koko mit́jum ket́ koa ar iṅrạj birud re ulgulạn re herel ko sãote barabar ko lạṛhạe ena.
- Warli Hul (1945-46): Maharastra reaḱ ṭhane surre ho̱e noa hul re godawari parulekar do̱ maejiu ko̱e mit́jum ket́ koa ar jamindar birud re lạṛhạe lena.
6.Naksalbaṛi andolan (1967): Niạ andolan re ạdivạsi maejiu ko ạdi saṅge hĩsko hatao leda ar sạhid hõko sạhid lena. Santi munḍa do̱ niạ andolan re sẽṛa enam tahẽ̱kan taea.
- Srikakulm Andolan (1968): Niạ andolan re Pancadi Nirmala do̱ sẽṛa enem tahẽ̱kan taea. Maejiu ko do̱ araḱ sạṛi bande kate mạric gunḍạwan te jạmindar ren gunḍa ko sãote ko samaṅ-dapram lena.
- Sardar-Sarovar Andolan: Medha paṭekaraḱ ạyurte Ạdivạsi maejiu ko do̱ niạ andolan ke̱ṭe̱ć ar lạṛhạean ko benao keda.
- Placimaḍa Andolan (2005): Keral re Cocacola plant reaḱ birud re ho̱e len noa andolan reaḱ ạyurić do̱ Mayalamma ńutuman ạdivạsi maejiu ho̱te̱te ho̱e lena.
Maejui koaḱ birtet́ reaḱ kạhni:
Singi Dai, Campu Dai ar Kaili Dai: Rohtasgaṛ ren Rajkumari ko tahẽ̱kana ar Urạõ jạt ren ko tahẽ̱kana. Noko do̱ aphagan Tuṛuk birud re ako jạt ren maejiu ko mit́jum ket́ koa arko lạṛạe ena. Runia-Jhunia: Budhu Bhagat re hopon era okoe do̱ ko̱l Hul re hĩs kin hatao let́ arkin sạhid ena. Phulo ar Jhano: Santal Hul re maejiu ko kin mit́jum ket́ koa ar iṅrạj birud re kin lạṛhạe ena. Maki Munḍa: Bo̱rlo̱ṅ- ṭeṅgo̱ć calao re gạkhuṛe tahẽ̱kana ar iṅrạj phạd ko são lạṛhạe re hĩse hatao leda. Ạdivạsi maejiu koaḱ saṅghars reaḱ katha do̱ eken enan reaḱ katha do̱ baṅ kana Unko do̱ te̱he̱ń hõ̱ o̱t-hasa, daḱ, bir-buru ar apnar ạidạri lạgit́ ko lạṛhạe kana. Unkoaḱ saṅghars ar bahaduri reaḱ kạhni abo̱aḱ nagam re mit́ sẽṛa hĩs lekate tahẽ̱na.
‘Compilation By Joy Sagar Murmu’
